「民选港姐」朱千雪旧年8月同医生男友吴昆伦喺巴里岛举行浪漫婚礼，呢日朱千雪趁住同老公结婚一週年纪念日，佢喺社交平台晒出旧年结婚时嘅婚纱相。

朱千雪仲对老公写落咗爱的宣言：「无论两个人曾经拍拖过几多次都唔紧要，当结婚之后，週年纪念又要由一开始计起，一週年快乐。」，唔少网民纷纷留言送上祝福。

讲到朱千雪，其实当年佢参选2012年香港小姐夺得季军入行，虽然当年因为网上投票系统发生问题，而失落冠军宝座，但却赢得民心，获封为民选港姐冠军。

朱千雪加TVB后备受力捧，首次参演电视剧《On Call 36小时II》即担任重要角色向芊儿，饰演医生嘅朱千雪无论係样貌定演技，都获网民激赞，更指《OnCall 36小时II》係朱千雪BB颜值巅峰之作。

当年25岁嘅朱千雪同49岁吴启华喺剧中饰演情侣，虽然两个人年龄差距大，但就出奇噉毫无违和感，观众激赞佢哋嘅演技自然，令人睇得舒服。

2016年朱千雪喺剧集《EU超时任务》首次担正做女主角大获好评，畀网友视为视后大热，虽然最终失落宝座，但同拍档王浩信凭此剧夺得「最受欢迎剧集搭档」。

翌年朱千雪再凭借《踩过界》勇夺《星和无线电视大奖2017》「我最喜爱TVB电视女角色」。

朱千雪事业发展顺利，但朱千雪醉心追求知识，宁愿减少幕前演出都要继续学业，佢喺2015年向TVB请假一年，去修读香港中文大学企业传播管理硕士课程。

2016年毕业之后，朱千雪再修读香港城市大学法律博士课程，一边读书，一路做嘢，获封为学霸港姐。

旧年6月份，朱千雪同拍拖5年嘅医生男朋友Justin拉埋天窗，过住幸福人妻生活，相信唔少网友都好期待可以再次睇到千雪BB嘅幕前演出。